- KINSHASA : Bubu yayi kele kilumbu y aba ta zika bantu ya bakaka lufwa na zandu ya Matadi-Kibala.
- BUNIA : Na kizunga ya Ituri, makesa ya Ouganda me kuma imene na Boga.
- KINDU : Na kizunga ya Maniema, kutambula kele diaka na kati ya Kalima mpe babwala ya munziunga.
- BUNIA : Beto bikala kaka kuna na kizunga ya Ituri, samu na kupesa nsangu yayi ya ngwakana ya me vutuka na kati ya dikanda ya ba Bira mpe ba Hema ya ke zingaka na Kangakolo na Territoire ya Irumu. Zola ya ba monisaka na kizole ya mposo yayi na Irumu-Centre, mingi na nima ya bilumbu zole ya masolo, na dibanza ya Monusco, na lusadusu ya mfumu ya Territoire yina ya Irumu.
- BENI : Na kizunga ya Kivu ya zulu, mingi na Territoire na yau ya Beni, makesa ya nsi fwaka bimpumbulu makumi zole na tatu ya ba Adf, mazuzi, mpe ba botulaka minduki tanu. Diambu ya salamaka na ndilu ti Territoire ya Mambasa. Makesa ya nsi me sepela mingi na mutindu ya nkangu pesaka bau maboko.
- KALEMIE : Na kizunga ya Tanganyika, ya me lunga bubu yayi bilumbu iya ya mwinda ya Snel ke na kupela ve na mbanza Kalemie. Na ndambu ya Snel, nsangu me zabana ti machini na bau ya kele na Centrale ya Kiyimbi na Bendera, bwala ya kele na kiteso ya bkm nkama mosi na makumi zole na tanu na kukuma mbanza Kalemie. Kukonda yina ya mwinda me kotisa bampasi ya mutindu na mutindu.
- MBANDAKA : Na ntangu yayi ya nsi na beto me kotisaka dinaka ya kupesa bana malongi nkatu kufuta, nzo ya bisalu ya Usaid me monisa luzolo na yau ya kupesa maboko na dinaka yayi, na kusadisa bana ya bansukami. Tala samu na nki, dinaka zibukaka, mazuzi na mbanza Mbandaka dinaka na zina ya beto longuka beto nionso, na dibanza ya kusadisa bau na kutanga mpe na kusonika.
- BUKAVU : Na Kivu ya nsi, nkangu ya ke zingaka na ntoto ya Ruzizi me zwa mwa coopérative mosi ya kusala mabele, na nsadisa ya nzo ya bisalu ya Monusco ya kele na Bwegera na Territoire ya Uvira.
/sites/default/files/2022-02/1102022-p-k-journalkikongomatin-00.mp3
