- KINSHASA : Na bansangu yayi, beno ta landa dibansa ya kimvuka na zina ya Le Congo n’est pas à vendre, mingi na nima ya kutulama ya maboko na mukanda ya ngwakana na kati ya luyalu ya nsi kimvuka Ventura ; kimvuka ya Dan Gertler, mvuama ya nsi ya Isreal.
- BUNIA : Na bizunga, beto ta kwenda ntete na Ituri, wapi makesa ya nsi kwenda kubotula na maboko ya bimpumbulu bantu nana ya ba kangaka na nzila Komanda-Luna. Na kati na bau, bankento zole mpe mwana mosi ya fioti.
- MAI-NDOMBE : Na kizunga ya Mai-Ndombe, dinaka ya malongi ya bana ke na kuzitisama ve na Insitut Mubanzila na Territoire ya Kwamouth. Na mwa bantangu, beno ta zaba kikuma.
- 12e CONFERENCE DIPLOMATIQUE : Bubu yayi kele kilumbu ya tatu mpe ya nsuka ya lukutakanu ya mbala kumi na zole ya nza ya ke tubila mambu ya nsalasani na kati ya bansi. Lukutakanu ya zibukaka mazuzi, kilumbu ya sabala awa na mbanza Kinshasa na lutwadusu ya mfumu ya nsi, mbuta Felix Tshisekedi. Ntu ya dilongi ya mbala yayi kele ; Nzingulu ya mbote ti bansi ya nzenza samu na kutomisa ntoto na beto ya Kongo Kinshasa, mpe kuvutuka ya ngemba.
- MBUJI-MAYI : Na kizunga ya Kasaï-Oriental, ya kiteso ya mafuda tanu ya balongoki ya ntama ya Université Officielle ya Mbuji-Mayi UOM na nkufi ya ke na kulomba mikanda na bau ya nsuka ya malongi. Ya kele mingi balongoki ya manisa tuka mvula mafunda zole na kumi na tatu ti na kilumbu ya bubu yayi.
- BULUNGU : Beto manisa bansangu yayi na kizunga ya Kwilu, mingi na Territoire ya Bulungu wapi banzila nionso me bebaka ngolo. Samu na yandi mosi mfumu ya Territoire ya Bulungu, mbuta Bernardin Mwankimi, diambu yayi ke na kupesa mpasi mingi samu na luzingu ya nkangu.
/sites/default/files/2022-02/2802022-p-k-journalkikongomatin-00.mp3
