- KINSHASA : Na bansangu yayi, beto ta tubila mukanda ya mbuta Martin Fayulu me sonikila bambuta ya kimvuka ya bansi ya ntoto na beto y’Afrika, mingi na yayi me tadila kuponama ya fwete kusimbama na mvula ke kwisa awa na Kongo Kinshasa.
- BUNIA : Na kizunga ya Ituri, kimvuka mosi ya bapanzi nsangu ya Bunia kumaka na Rhoe, sika ya ba me tulaka bantu ya tinaka mvita na babwala na bau. Na kutuba na bau, Monusco ke na kukengela bau.
- GOMA : Mpe na Kivu ya zulu, mingi na buloko ya nene ya Munzenze na mbanza Goma, bantu mingi kele kuna, kansi me samaka ve.
- KANANGA : Nsangu na bizunga. Na Kasai Central, nzo ya bisalu ya kupona, CENI na nkufi na mbanza Kananga yantikaka mazono na kusonika mazina ya bantu ya ke sosa kunuani kiti ya mfumu mpe kilandi ya mfumu ya kizunga yina. Kuponama ya fwete kusimbama na kilumbu ya sambanu ya ngonda ya iya ya mvula yayi na kati ya bizunga kumi na iya.
- BUNIA : Bimpumbulu ya Codeco, wapi kumi na sambanu na kati na bau kangamaka na bukondi ya makesa ya nsi ya pesaka bau dilongi ya ngolo. Nionso yayi na nima ya kunuana ya lutaka na lumingu na kati ya bau ba Codeco, mpe ba FPIC na bwala Abombi ya kele kaka na kiteso ya bkm makumi nsambwadi na tanu na kukuma mbanza Bunia, na Territoire ya Djugu.
- MBUJI-MAYI : Na kizunga ya Sankuru, kimbeni ya ntoto me kitisa diaka bantu na nsi ya ntoto na Territoire ya Lodja. Na nionso, kele bantu tatu ya bakaka lufwa na kilumbu ya sabala me luta, makumi zole na tanu lwalaka ngolo, mpe kiteso ya banzo nkama zole yokamaka tiya na bwala ya ba Mongo, mpe diaka na bwala Nvunge. Kiteso ya mabuta nkama mosi me tina na ndambu ya Lodja.
- REACTION CAGF : Kaka na bansangu ya suka yayi, nzo ya luyalu ya ke pesaka maboko na nsadilu ya mbongo na ndambu ya nzo ya luyalu ya ke landilaka mambu ya mavimpi, CAGF na nkufi. Samu na nzo yayi ya mbula matadi, ba ke na kuzaba ve mambu ya IGF ke na kufunda bau ; kuna, muyibi mosi ve ya mbongo me salamaka.
- CRASH: Nsangu yankaka na suka yayi kele ya kuzika ya Avio mosi ya Compagnie Agefreco, kaka na nima ya mwa bantangu ya kupumbuka na yau, mazono na nganda y’Avion ya Kavumu, mingi na ntangu ya iya ya nkokila. Kinati y’Avion, mpe kilandi nandi ya vandaka na kati wulukaka, mpe basikaka. Mpe na kutuba ya bisadi ya RVA, bima nionso ya vandaka na kati zikaka na tiya. Kikuma ya kisumbula yina me zabana ntete ve.
/sites/default/files/2022-02/150202-p-k-journalkikongomatin-00.mp3
