- KINSHASA : Beto zabisaka yau, ntotila ya nsi ya Belgique, mbuta Philippe mpe nkento nandi, mama Mathilde ta sala nzietelo ya kisalu awa na bwala kimfumu, Kinshasa, katuka kilumbu ya sambanu ya ngonda ke kwisa ti na kilumbu ya kumi, na luzolo ya mbuta Felix Tshisekedi, mfumu ya Kongo Kinshasa. Nsangu ya me pesama na mfumu ya nzo ya bisalu ya mfumu ya nsi, na kulanda luzayisu mosi.
- KINSHASA : Na bamvula tatu yayi ya kuzanzila kutambula ya bandimi ya salamaka na kilumbu ya kumi na sambanu ya mvula ya difunda mosi na nkama uvua na makumi uvua na zole, samu na kulomba kuzibuka ya masolo ya ban aya nsi ya kangama, kilumbu yayi kwelanaka na kilumbu ya mazono, kitatu.
- KINSHASA : Kele na kizole ya mposo yayi ya Udps sepelaka nkinzi na yau ya kusalama ya bamvula makumi iya. Mpe na kutuba nandi, kalaka ya Udps/Tshisekedi, mbuta Augustin Kabuya na lususwanu ti bamvula ya me luta, mbala yayi, kimvuka yayi ya politiki ya mfumu ya nsi me kudipesa kaka na mfumu nzambi.
- PROCES CHEBEYA : Na lusambusu ya bantu ya me tangamaka samu na lufwa ya Floribert Chebeya mpe Fidèle Bazana, mutindu ya beto zabisaka yau, kele na kilumbu ya mazono ya banzonzi ya bandambu nionso bakaka ndinga. Mazono, kuna nan zo ya nene ya masonga ya makesa na buloko ya Ndolo, banzonzi yayi lombaka kusamba ya mbuta Joseph Kabila mpe John Numbi na ntwala ya bazuzi.
- GOMA : Nkama zole na makumi uvua, kele mingi bamambu ya mbi ya kuminaka bimvuka ya nza ya ke pesaka lusadusu na bansukami na mvula me luta na bizunga ya kele na ndambu ya Esete ya nsi na beto. Samu na yau, bisadi nsambwadi ya bimvuka yayi vidisaka mioyo na bau ; tatu na Kivu ya zulu. Nsangu ya me zabana na kubasika mazuzi ya mukanda ya bansangu ya Ocha.
- MBUJI-MAYI : Kele na kintete ya mposo yayi ya bisalu ya kupesa mangwele samu na kutita nsamukila ya kimbefo ya coronavirus manaka na kizunga ya Kasai-Oriental. Kansi, bantu mingi ya bakaka mangwele yina na kati ya bisika nkama mosi na makumi iya ya ba kabulaka na kati ya ba Zone kumi na uvua ya kizunga yayi kele na yau ke na kuzaba ve inki nkisi ya mangwele ya ba pesaka bau.
- BANDUNDU : Mpe kuna na nge mosi Irene Mboma na kizunga ya Kwilu, wapi nge kele ntumwa na beto, ya kele kiteso ya bantu mafunda zole na nkama sambanu ya me bakaka nkisi yayi ya mangwele samu na kutita nsamukila ya kimbefo ya Coronavirus, tuka luyantiku ya dinaka yina, katuka ngonda yantete ya mvula yayi.
- KINDU : Na kizunga ya Maniema, ba zone yankaka tatu ya mavimpi, na kukatula kaka Zone ya Tunda kele ti kimbefo ya monkey pox ya ke na kukwamina kuna. Nsangu ya me pesama na bansinga ya Radio na beno ya Ngemba, mbuta ya luyalu ya kizunga ya ke talaka mambu ya mavimpi, mazuzi.
/sites/default/files/2022-02/1702022-p-k-journalkikongomatin-00.mp3
