- KINSHASA : Na bansangu yayi, beto ta tubila nzietelo ya mbuta Jean Pierre Lacroix salaka, mazono na Rhoe, sika ya ba me tulaka bantu ya tinaka mvita.
- KINSHASA : Awa, na Kinshasa, nsangu kele mingi ya lukutakanu ya bambuta ya luyalu ya bansi ya tulaka maboko na mukanda ya ngwakana ya Addis-Abeba.
- KWANGO : Na kizunga ya Kwango, beto ta tubila kubasika ya kimbefo ya Typhoide, mingi na Popo Kabaka ; wapi kiteso ya bantu difunda mosi na nkama iya na makumi tanu na nana me baka yau.
- BUNIA : Beto bikala kaka kuna na Ituri, kansi ntangu yayi samu na kuzabisa ti makesa ya nsi kangaka bantu ya mbi kumi na nana ; wapi zole na kati na bau kele bimpumbulu ya FPIC. Diaka makesa ya nsi botulaka minduki tanu. Nionso yayi na ntangu ya bapulusi vandaka ke sosa sosa na mbanza Bunia ; ya vanda mpe na ntangu ya kunuana ya lutaka pene pene ya mbanza Bunia na kati ya makesa ya nsi mpe bimpumbulu yina ya FPIC.
- LOMAMI : Na kizunga ya Lomami, kuna, kele kukwamina ya kintuntu na Luputa. Na nsangu ya me katuka na ndambu ya mbuta ya ke landilaka mambu ya mavimpi kuna, bana kumi na mosi, ya me lungisa ntete ve bamvula tanu ya kubutuka me baka yau. Munganga Fred Bulobo ke bansa ti kikuma ya kubasika diaka ya kintuntu yina kele kukonda ya kupesa bana mingi mangwele.
- LUBUMBASHI : Na Territoire ya Malemba Nkulu na kizunga ya Lomami ya zulu nzala me kuma mingi na ndambu ya bana. Kuna, banzoko bebisaka malanga ya bantu, mpe bamvula ya ngolo. Nkangu me lomba nsadisa.
- BUKAVU : Na Kivu ya nsi samu na kumanisa, ntalu ya essence me mata bilumbu yayi, mingi na mbanza Bukavu. Kikuma, bisalu na yau me fietuna na bansi ya ke basisaka masa yayi.
/sites/default/files/2022-02/2302022-p-k-journalkikongomatin-00.mp3
