- KINSHASA : Na bansangu yayi, beto ta tubila lukutakanu ya ke na kuvikisa na mbanza Bruxelles bamfumu ya bansi y’Afrika mpe ya mputu.
- BUNIA : Na kizunga ya Ituri ; bimpumbulu ya Codeco me kanga bisadi nana ya Task Force ; mpe awa na mbanza Kinshasa, zibukaka dinaka ya bisalu ya kupesa lusadusu na bansukami samu na mvula yayi.
- KINSHASA : Lukutakanu ya banganga mayele ya bimvuka ya nkangu ya nsi na beto ke mona ti kuponama ta simbama ve na mvula ke kwisa.
- PLAN HUMANITAIRE : Bamillion makumi zole na nsambwadi, kele ntalu ya bantu ya ta vanda ti mfunu ya lusadusu awa na nsi na beto na mvula yayi. Na nionso, ya fwana kiteso ya milliard mosi na ndambu ya ba dollars. Ntalu ya zabanaka, mazono, na mukembo ya kuzibula dinaka ya bisalu yayi ya kupesa lusadusu na bansukami na mvula yayi. Mukembo ya lutaka na ntwala ya bantumwa ya bansi mingi ya ke pesaka kabu yayi.
- KINSHASA: Bimpumbulu, bana yayi ya bifu ya mbi me vutuka diaka na kuyala awa na bwala kimfumu, Kinshasa. Na ba Quartier ya mutindu na mutindu, ba ke na kusala nionso ya ba ke zola; mpe na ndambu ya nkangu kaka kubokuta. Katuka Commune ya Makala, Lemba, to diaka Kisenso na kubaka kaka kifwanusu ya ba Communes yayi, bantu yayi ya mbi ke na kunuana konso kilumbu na kati na bau, to na kati bimvuka na bau ya kele na ba Commune ya me kabulaka bandilu.
- GOMA: Na Kivu ya zulu, nzo ya nene ya masonga ya makesa me lomba ti ba Sambisa bamfumu zole ya makesa ya nsi, na mutindu ya ba ke funda bau na kuzola kupesa madesu ya bana na kimvuka ya makesa ya kwendaka kuzikisa mutindu ya ba ke na kusadila mbongo ya mbula matadi tindaka. Na kati na bau zole, mosi kele Général mpe yankaka Colonel ya kele na kizunga ya makumi tatu na iya ya makesa.
- MATADI: Na kizunga ya Kongo Central, mingi na mbanza na yau ya Boma, mfumu ya mbanza me benda makutu ya balongoki ya banzonkanda ya malongi ya zulu ya ke na kusonika mazina na bau na banzonkanda ya me zabanaka ve na ndambu ya mbula matadi, mpe ya luyalu me kangaka mielo na yau.
/sites/default/files/2022-02/1802022-p-k-journalkikongomatin-00.mp3
