- KINSHASA : Lukutakanu ya bantumwa ya balongi ya banzonkanda ya malongi ya zulu me pesa nsangu ya kuvutuka ya bisalu na bau na bandambu nionso ya nsi na beto. Lukanu ya bakamaka, mazono, mingi na nima ya masolo ya simbamaka na kati bantumwa yayi ya balongi ti luyalu. Na kati ya mambu ya me kitisa ntima ya balongi yayi ya banzonkanda ya malongi ya zulu, ya kele mingi kusalama ya mwa bimvuka ya ta landakanaka masolo ntangu nionso, kubasika ya balongi ya ke futamaka ve.
- MATADI : Mpe na kizunga ya Kongo Central, nsangu ya me kumina beto kele ya kuvutuka na kisalu ya bantu ya ke salaka na baCompagnie ya ke pesaka Compagnie ya Pétrole ya Perenco, tuka suka ya mazuzi. Bilumbu iya ya mvimba bisadi yina buyaka na kusala, samu na kulomba ti ba katula lususwanu ya kele na kati na bau ti bisadi yankaka, mingi na yayi ya me tadila mpasi ya luzingu, mpe mbongo ya kufutila banzo.
- MBUJI-MAYI : Na mbanza Mbuji-Mayi, binati batuku tuku monisaka nganzi na bau kuna, na suka ya mazono, na kutala kumata ya ntalu ya essence. Litre mosi ya vandaka ke tekama na mposo me luta na mafunda tanu ya Fc, bubu yayi me kuma kutekama na mafunda nsambwadi ya Fc. Ntalu ya me mata na kutala ya kieleka ti masa yayi ke na kumonana diaka mingi ve kuna na bwala kimfumu, Kinshasa.
- KANANGA : Na mbanza Kananga, kuna kele kubokuta ya nkangu samu na kukonda ya mwinda ya Snel, katuka luyantiku ya ngonda yayi. Awa, nsangu me zabana ti na ntangu ya mfumu ya nsi, mbuta Felix Tshisekedi salaka nzietelo kuna, mwinda pelaka na ngonda nionso ya me luta.
- KINDU : Lukanu ya kukatula ba barriere na bisika ya me zabanaka mingi na mbanza Kindu ; lukanu yayi ya mbuta ya ke na kusala bilumbu yayi ya sika ya mfumu ya kizunga ya Maniema ke na kuzitisama ata fioti ve. Kifwanusu ya nene kele na nzila Kindu-Kibombo. Bantu ya ke na kuluta nan zila yina ke lomba na mfumu ya kizunga na kulandila yandi mosi lukanu nandi yayi.
/sites/default/files/2022-02/0802022-p-k-journalkikongomatin-00.mp3
